Hala ere, egun honek eskola egun eta auzolan egun izan nahi zuen. Horrela erabaki zuen Ikastolako Errektore Kontseiluak langileen eskariari erantzunez. Baina salaketa bat medio, Hezkuntza Ikuskaritzak urriaren 12a eskola egun izatea galarazi digu.
Ez ditugu Hezkuntza Sailaren arrazoiak eta mehatxuak ulertzen, ez eta partekatzen ere, eta horregatik lanean jarraituko dugu, hurrengo ikasturtean ikastolan lantzen ditugun balioekin bat datozen egunak ospatu eta euskal egutegi propio baten baitan gure ikasturtea antolatzeko.
Bereziki eskertu nahi diegu, auzolan hau aurrera eramatea posible egin duten norbanakoei eta Ibarrako udalari, emandako material eta laguntza guztiagatik. Eta, nola ez, parte hartu duten familia eta langile guztiei.
Guk biziki sinesten dugu komunitatearen indarrean eta auzolanaren balioetan, eta gaur ikusi dugu Uzturpe bizi-bizi dagoela! Egunero, elkarlanean, gure onena ematen jarraituko dugu gure ikasleek merezi duten kalitatezko euskal hezkuntza jaso dezaten, merezi ditugun baliabide guztiak ikastolan izan ditzagun eta komunitatean adostutako euskal egutegia indarrean jar dadin .
