Gure komunitatean une berezi bezain hunkigarria bizi genuen otsaila hasieran: Ixiarrek jubilazioari ekin zion, 39 urteko lan-ibilbide luze eta oparoari amaiera emanez. Urte hauetan guztietan, haur ugari igaro dira bere eskuetatik, eta guztiek jaso dute bere arreta, zaintza eta maitasuna. Ixiarrek egindako ekarpena handia izan da, bai hezkuntzan eta baita pertsonen arteko harremanetan ere.
Alaia, goxoa, konkistatzailea eta energiaz betea, Ixiarren presentzia ezinbestekoa izan da egunerokoan. Abestizale amorratua, beti kantu batekin giroa alaitzen, bere izaera hurbil eta beroak arrasto sakona utzi du ikasle, familia eta lankideengan. Komunitate osoaren izenean, eskerrik beroenak eman nahi dizkiogu egindako guztiagatik, eta etapa berri honetan zoriontasuna, lasaitasuna eta merezitako atsedena opa dizkiogu.
Mila esker bihotzez, Ixiar
