Jardun biko ikastaro honek bi atal izango ditu: Batetik, irakasle bakoitzak on-line egin beharko duen lan pertsonala eta bestetik, ikastolan gauzatuko diren saio kolektiboak. Bertan, Ikastolen historia, zer den Ikastola, nondik gatozen, nora goazen, zer den kooperatiba bat eta batez ere nora goazen landu, hausnartu eta pertsona-eredua garatzen arituko gara.
Ikastolen Hezkuntza Marko Orokorra gure hezkuntza ulertzeko eta garatzeko elementuak barne hartzen dituen egitura da. Helburua ikasleei pertsona-eredu bat garatzen laguntzea da, eta horretarako, hezkuntza-ildoak, printzipio psikopedagogikoak eta curriculuma biltzen ditu bere baitan.
Aurrerago, Ikastolen Hezkuntza Marko Orokorra zer den langilego guztiari zabalduko zaio, izan ere, nahiz eta formazio hau irakasleentzat bideratua dagoen komunitate osoak honen inguruan jakitea garrantzitsua dela iruditzen zaigu. Eta ez jakitea bakarrik, bertan murgiltzea eta denon artean bide hau egin dezagun denok txalupa berberean gaudela ziurtatu behar dugu, inor atzean edota kanpoan geldi ez dadin. Ikastolako familiek ere izango duzue gogoetan murgiltzeko aukera.
