Inauteriak gerturatzen ari diren honetan, Uzturpe ikastolan hasi gara prestaketa lanekin eta festa giroa geroz eta nabariagoa da gurean.
2 urtekoak hasi dira haien tailerretan mozorroak ateratzen, horiek arakatzen eta probatzen.
HHko ikasleek, bestetik, ahozkotasun saioetan, Lantzeko Inauterietan aurki daitezkeen Miel Otxin eta Ziripot bezalako pertsonaia mitologikoak ezagutzeaz gain, Ameriketatik Euskal Herrira itsasontzi batean datozen bi indiar txikiren istorioa ere ezagutu dute. Aldi berean, Ostegun Gizeneko mozorroaren prestaketa lanetan buru-belarri dabiltza, sormenari leku eginez.
LHko ikasleak, berriz, Ostegun Gizenean eskainiko duten jaialdiaren prestaketan murgilduta daude. Adinka antolatuta, talde bakoitzak emanaldi bat eskainiko diete bertaratzen diren ikasle eta irakasleei.
Datorren Ostegun Gizenean, Uzturpeko ikasle eta irakasle guztiok turistak bihurtuko gara; eta goizari amaiera emateko, eguraldiak laguntzen badigu, herriko plaza bisitatuko dugu Euskal Polken erritmora dantza eginez.
