Uzturpe Ikastolako ikasle den Ane Zubiak Ikastolari bertso batzuk eskaini dizkio bere konfinamendutik. Mila Esker Ane!
Doinua: Zer da gaur Donostian
Nahi gabe bihurtu da
etxea kaiola
nahiz txikitzen ari den
pixkanaka bola
argi dago kontua
iluna dagola
baina ez dezagun etsi
orain edonola
ea sartzen diogun
birusari gola
Zein garrantzitsua den
umeen arnasa
nahiz bizi beren eran
eta beren kasa
zeinen mundu sortzaile
eta aberatsa
ondo josi dituzte
hari ta orratza
tristura bilakatuz
pozaren jolasa
Jarri ezkero lehio
ertzetik begira
ondokoek badute
nahiko tira-bira
parekoek ordea
a ze kalejira
goiko amonak duen
poz eta diztira
bizilagun guztiak
ez berdinak dira
Nahiz desberdinak izan
antzekorik bada
berdin Jon, Mikel, June
Edo ta zuhara
denok ordu berean
ateratzen gara
terraza, lehio ertze
ta balkoietara
entzun dezaten gure
txalo zaparrada
Zaintzaile, garbitzaile
edo ta mediku
Egunero lanean
milaka aditu
Oraingoan badute
nahikoa meritu
nahiz ez duten oraindik
iluna argitu
Herritarron babesak
lagunduko ditu
Nahiz ikasketa ez den
orain lehentasun
ta ikasleek izan
sobera gaitasun
bidean bada nahiko
kalte ta zailtasun
Alere irakasleek
a ze gertutasun…
Egiten duten lana
balora dezagun
Esku baten papera
bestean margola
ohe barruan sortuz
nork bere txabola
Sukaldea zikinduz
eginez kirola
nahiz denbora pasatu
badakigun nola
faltan botatzen degu
denok ikastola
