Maiatzaren 27an 'Arnastu euskara' lipdub erraldoia hartuko du Tolosak; kantua eta ibilbidea prest ditu Galtzaundi Euskara Taldeak.
Tolosaldea euskararen arnasgune bilakatze bidean, Galtzaundi Euskara Taldeak hilabeteak daramatza maiatzaren 27ari begira: Arnastu euskara lipdub erraldoia antolatu dute ordurako, eta kantua eta ibilbidea prest dituzte jada.
Tolosako Plaza Zaharrean egin dute aurkezpena, hantxe biribilduko baitute lipdub jendetsua. Kantu baten erritmoa eta letra jarraituz, izena eman duten herritar eta talde guztiek ibilbideko kaleak zeharkatzea izango da gakoa, amaieran guztiak Plaza Zaharrean elkartzeko. Horrela, beraz, Arnastu euskarak ezinbesteko zuen elementua ondu dute dagoeneko: kantua.
Zigor Sagarna tolosarrak sortu du melodia, eta Laket taldeak jantzi du musikaz; perkusioan Xabier Beldarrainen laguntza izan dute. Grabaketa, berriz, Ereñozuko (Hernani, Gipuzkoa) Aieka estudioan egin dute, Pello Gorrotxategiren zuzendaritzapean.
