ERRIGORA: Bertako nekazaritzari eta euskarari bultzada emateko egitasmoa
Iazko esperientzian oinarrituta, dagoeneko martxan da ERRIGORA ekimenaren bigarren urtea. Bertako nekazaritzari eta euskarari bultzada emateko egitasmoa da; nekazariek ekoitzitako produktuak erosiz, lortutako irabazien bidez euskarak irauteko eta garatzeko arazoak dituen lurraldeetako hainbat ekimeni bultzada ematen zaio.
ERRIGORA ekimenak, auzolanean, Nafarroako hegoaldeko nekazaritza indartzea du asmo, horretarako, eremu horretakoak propio diren produktuak Euskal Herriko plazan jarriz. Izan ere merkatu globalizatuak konpetentzia baldintza gogorretara behartzen ditu bertako lehengaiekin lan egiten duten ekoizleak. Aldi berean “zona no vascófona” izendatuko euskalgintzari ekarpentxoa egin nahian bultzada ekonomikoa ematea ere badu helburu.
Horretara dator “NAFAR HEGOALDEKO UZTA; EUSKARARI PUZKA” kanpaina. AEK, Sortzen eta Ikastolen Elkartea eta Zazpiak Bat Harreman Sarearen elkarlanaren emaitza da kanpaina hau.
50 €-ren truke Nafarroako hegoaldeko produktuez osatutako saski bikaina jaso dezakezu; kalitate bikaineko produktuak, bertan ekoitziak eta nekazarien lana errekonozitzen dutenak. Eta merkatuko prezio berean, baina desberdintasun nabarmen batekin: jasotako diruaren %25 euskarari bideratuko zaio herritar askoren borondatezko lanari esker.
Aurten bilduko den dirua hiru proiektu zehatz laguntzeko erabiliko da:
- Egoera larrian den Lodosako ikastola
- “Euskaraz bizi eta ikasi” herri ekimena
- Erriberako helduen euskalduntzea mantendu eta zabaltzea
ERRIGORA ekimenean parte hartzen duten eragileen edo haien bitartez saldutako produktuen irabaziak eragile bakoitzak bultzatutako proiektura bideratuko dira. Ikastolen kasuan, ikastolek eta haien bitartez saldutako produktuen irabaziak Lodosako ikastolara bideratuko dira.
