Zer gertatzen ari da Ukrainan? Zergatik? Gerra hona iritsiko al da? Galderak pilatzen dira ikasgelan sartu bezain laister, eta egunero. Erantzunak bilatzea, baina, ez da erraza. Nazioarteko gatazka honek sekulako ikusmira bereganatu du gizarte mailan eta eskola ez da salbuespena. Telebista ala irratia piztu, Interneten konektatu eta nonahi entzun daiteke suntsipenaren oihartzuna. Baina eragin handiagoa dauka Ukrainako gelakideak izateak: nire alboan esertzen den horrek, hain zuzen, familia du herrialde hartan. Dozena erdi bat dira.
Galderak kateatzen direla, Ukrainatik etorritako gelakideei begiratzen diete askok. Non daude zure senideak? Onik al daude? Zer egingo dute? Mari erantzuten saiatzen da, hainbatetan emozioak nekez uzten badio ere. Bere izebak eta lehengusinak Errumaniara igaro dira babes bila. Gizonezkoentzat, ordea, ezinezkoa da: borrokatu behar dute. Dima isilagoa da eta isila izaten jarraitzen du. Galdera gutxi jasotzen ditu, beraz, baina aspaldi erreparatu diogu denok bere begiradaren dizdirari. Aste gutxiko kontua da.
